पिकअपला लुटणाऱ्या टोळीचा पर्दाफाश ; एलसीबीने चार दरोडेखोरांना केले गजाआड

बीड : नातेवाईकाचे अंत्यविधी आणी रक्षा सावडण्याचा विधी उरकून पुणे येथे जाणाऱ्या पिकअपला कार आडवी लावून कोयत्याचा धाक दाखवून ७२ हजार रुपयांचा ऐवज लुटल्याची घटना चार दिवसांपूर्वी केज-बीड रोडवर कोरेगाव फाट्या जवळ घडली होती.या टोळीचा बीड एलसीबीने पर्दाफाश करत चार जणांना अहमदनगर व पुणे जिल्ह्यातून ताब्यात घेतले आहे. याबाबत सविस्तर माहीती अशी की,दिनांक २७ सप्टेंबर २०२२ रोजी पहाटे ४:०० वाजण्याच्या दरम्यान खतगाव जि.नांदेड येथील धनाजी किसनराव भोसले हे चुलत्याचे अंत्यविधी व रक्षा सावडण्याचा विधी उरकून कुटुंब आणी इतर नातेवाईकांसह पिकअप क्र.एम.एच.१२ टी व्हि ३९०५ रिक्षाने पुण्याला चालले होते.दरम्यान ते केजच्या पुढे गेले असता. कोरेगाव फाट्याजवळ पाठीमागून आलेल्या सिल्व्हर रंगाच्या कारने ओव्हरटेक करुन पुढे येत कार आडवी लावून कोयत्याचे धाक दाखवून रोख रक्कम आणी महिलांच्या अंगावरील दागिने असा एकूण ७२३५० रुपयाचा ऐवज लुटून नेला.याप्रकरणी धनाजी किसनराव भोसले यांच्या फिर्यादीवरून अज्ञात आरोपींच्या विरोधात केज पोलीस ठाण्यात दरोड्याचा गुन्हा दाखल करण्यात आला आहे. घटनेचे गांभीर्य लक्षात घेऊन पोलीस अधीक्षक नंदकुमार ठाकूर यांनी बीडच्या एलसीबीला या गुन्ह्याचा छडा लावण्याचे आदेश दिले. त्यानुसार एलसीबीने असे गुन्हे करणाऱ्या पुणे, अहमदनगर,नांदेड, सोलापूर,लातूर आणी बीड जिल्ह्यात माहिती घेऊन तपास सुरू केला. यावेळी पोलीस निरीक्षक एच.पी.कदम यांना गुप्त खबऱ्याकडून सदरील गुन्हा लखन जिजाराम साळवे रा.राशिन ता. कर्जत जि.अहमदनगर याने इतर साथीदारांच्या मदतीने केल्याची खात्रीलायक माहिती मिळाली.माहिती मिळताच बीड एलसीबीने राशिन येथे जाऊन लखन साळवे यास ताब्यात घेतले.सदरील गुन्ह्याची अधिक चौकशी केली असता.त्याने उडवाउडवीची उत्तरे दिली.परंतु पोलीसी खाक्या दाखवताच ज्ञानेश्वर उर्फ माऊली तुकाराम कोल्हे रा.जवळा जि.नांदेड,वैभवआजिनाथ हजारे जवळा,अविनाश परशुराम गायकवाड रा. हडपसर पुणे आणी शुभम रमेश मोरे रा.पापडीवस्ती हडपसर,पुणे यांच्या मदतीने केल्याची कबुली दिली.यातील ज्ञानेश्वर कोल्हे व वैभव हजार या दोघांना जवळा येथून तर अविनाश गायकवाड यास हडपसर येथून ताब्यात घेतले आहे.शुभम मोरे यास ताब्यात घेण्यासाठी पथक रवाना झाले परंतु हडपसर पोलीसांनी त्यास दुसऱ्या एका गुन्ह्यात अटक केली आहे.ती कारवाई पुर्ण करुन त्यास बीड पोलीस ताब्यात घेतील.कोणताही पुरावा नसताना अवघ्या चार दिवसांत बीड एलसीबीने या रोडरॉबरीचा छडा लावल्याने सर्व स्तरातून त्यांचे कौतुक होत आहे.